Norræn ráðherranefnd kynnir sér íslenska hestinn

Nýverið kom til Íslands sendinefnd með 60 fulltrúum frá landbúnaðarráðuneytum Norðurlandanna í heimsókn.

 

Í ferðinni kynntu þau sér m.a. íslenska hestinn og markaðsverkefnið Horses of Iceland. Þáðu þau boð um að koma og skoða hrossarækt Gangmyllunnar á bænum Syðri-Gegnishólum hjá Selfossi, sem er í eigu Olil Amble og Bergs Jónssonar.

 

Jelena Ohm, verkefnastjóri Horses of Iceland, hélt kynningu á verkefninu og Olil sagði frá hrossaræktinni og eiginleikum íslenska hestsins. Eftir kynningarnar fékk hópurinn leiðsögn um hesthúsið á Syðri-Gegnishólum og boðið var upp á sýningu í reiðhöllinni þar sem Gangmyllan tefldi fram sínum bestu gæðingum. 

 

Heimsóknin var í vegum Norrænu ráðherranefndarinnar, en Ísland fer með formennsku í nefndinni í ár. Í ferðinni funduðu ráðherrarnir m.a. um loftslagsbreytingar og gróðursettu tré í Gunnarsholti til að kolefnisjafna ferðalög sín. 

 

Lesa má nánar um heimsóknina á vef Stjórnarráðs Íslands.